النفط راكب 🇱🇾 والدولار يقوى 💵 والذكاء الاصطناعي يحرق في المليارات 🤖🔥

نشرة ولد السوق 🚀 محصلة أخبار الاقتصاد والبزنس العالمي والمحلي بطريقة بسيطة.

نهاركم مبروك 👋

في الشهر هذا عندنا رأي المدون الليبي والناشط السياسي المهدي هندي في إنتاج النفط الليبي ورجوعه لأعلى مستوياته التاريخية، وكيف انعكس هذا علي حياة المواطن. وعندنا المصارف الليبية تفتح باب جديد للتعامل مع الصين 🇨🇳، بعدها بنطلعو من ليبيا بنديرو دورة علي مليارات المستثمرين اللي مراهنين عالدولار ومشاكل الجغرافيا بين باب المندب وهرمز 💵. بنمشو لدبي نشوفو التسهيلات اللي صايرة غاذي لرواد الأعمال، وبعدها نطلعو طول لقناة السويس ومنها نصيفو في الساحل الشمالي في مصر. 

شن صاير في ليبيا؟ 🇱🇾

📍 إنتاج النفط الليبي قريب من 1.5 مليون برميل يومياً 🛢️📈

المهدي هندي يعلق علي بيانات المؤسسة الوطنية للنفط إن إنتاج ليبيا وصل تقريباً 1.49 مليون برميل يومياً، وهو أعلى مستوى من سنة 2013.

رقم ممتاز أكيد، خاصة بعد سنوات من الإقفالات والحروب والمشاكل السياسية، ويحسب للعاملين في قطاع النفط إنهم قدروا يوصلوا للإنتاج هذا في ظروف صعبة جداً 👏.

لكن السؤال الأهم مش: كم برميل ننتجوا؟

السؤال هو: شن استفاد المواطن؟

في 2013 كنا ننتجوا تقريباً نفس الكمية، لكن القوة الشرائية للدينار كانت أحسن، والسيولة متوفرة أكثر، والأسعار أقل.

اليوم النفط قريب من نفس المستوى، لكن المواطن يواجه ارتفاع أسعار، وضعف في القوة الشرائية، ومشاكل سيولة وتكاليف إضافية للحصول على العملة الأجنبية 💸.

وهني النقطة المهمة:

زيادة إنتاج النفط بروحها مش معناها اقتصاد أقوى.

باش المواطن يستفيد فعلاً، الدولة محتاجة تتحكم في الإنفاق، وتحافظ على استقرار الدينار، وتطور الكهرباء والصحة والتعليم والطرق، وتستثمر جزء من الإيرادات في قطاع النفط نفسه باش الإنتاج يستمر.

والأهم من هذا كله: الشفافية. لما الإيرادات تزيد، المواطن من حقه يعرف وين تمشي الفلوس.

1.5 مليون برميل في اليوم إنجاز كبير… لكن الإنجاز الحقيقي هو لما المواطن يحس بيه في حياته اليومية. 🇱🇾

almahdi Hindi

📍 بنغازي استضافت معرض Libya Digital 2026 💻🇱🇾

استضافت بنغازي من 27 لـ30 يوليو معرض وملتقى Digital Libya Expo 2026، واللي جمع شركات تقنية وجهات حكومية وخاصة ومهتمين بمجالات التحول الرقمي والتكنولوجيا المالية والذكاء الاصطناعي. 💻🤖 

الحدث كان هدفه يدفع أكثر في اتجاه التحول الرقمي في ليبيا، ويوفر مساحة للشركات ورواد الأعمال والجهات الحكومية باش يناقشوا حلول التقنية وتطوير الاقتصاد الرقمي، ومعاه كانت فيه فعاليات مرتبطة بالتوظيف والتكنولوجيا والابتكار. 

بالنسبة لليبيا، الفعاليات زي هذي مهمة لأن تطوير الاقتصاد مش كله نفط وطرق ومباني؛ البنية التحتية الرقمية والمصرفية جزء أساسي من أي اقتصاد حديث 📱💳.

ولو ليبيا تبي فعلاً تطور الخدمات المصرفية، التجارة الإلكترونية والـFinTech، لازم الأحداث هذي في النهاية تتحول من كلام ومعارض إلى شركات ومنتجات وخدمات تقنية يقدر المواطن يستخدمها فعلاً. 🚀

Digital Libya Benghazi

📍 المركزي يرجع لشهادات المضاربة 💰

مصرف ليبيا المركزي دعا المصارف التجارية للاكتتاب في الإصدار رقم 21 من شهادات إيداع المضاربة المطلقة.

قيمة الشهادة الواحدة 10 مليون دينار، وفيه 3 مدد:

⏳ 91 يوم ⏳ 182 يوم ⏳ 365 يوم

وهامش الربح المتوقع بين 5.5% و7.5% سنوياً، لكنه تقديري ومش مضمون.

الفكرة بشكل مبسط: المركزي يحاول يوفر للمصارف أداة يحرك بيها جزء من السيولة بدل ما تظل الفلوس راقدة، وفي نفس الوقت يحاول يطور أدوات السياسة النقدية في ليبيا.

📍 المصارف الليبية تفتح طريق مباشر للصين 🇱🇾🤝🇨🇳

من أهم الأخبار المحلية الشهر هذا:

مصارف تجارية ليبية وافقت على الانضمام لمنظومة المدفوعات الصينية CIPS، بعد مباحثات بين محافظ مصرف ليبيا المركزي ومحافظ بنك الشعب الصيني.

شن معناها CIPS؟

ببساطة، هي منظومة تقدر من خلالها المصارف ادير معاملات وتحويلات مرتبطة بالصين مباشرة وبـاليوان الصيني بدل الاعتماد بالكامل على الدولار وشبكات المصارف الغربية.

وبالنسبة لبلاد تستورد كميات ضخمة من الصين زي ليبيا، الخطوة ممكن مستقبلاً: 💸 تقلل بعض تكاليف التحويلات والمصارف الوسيطة. 🌍 تنوع طرق الدفع المتاحة للتجار الليبيين. 💵 وتقلل الاعتماد الكامل على الدولار في جزء من التجارة.

لكن نجاحها يعتمد على قدرة المصارف الليبية على الالتزام بالمعايير الدولية، خاصة مكافحة غسل الأموال، وعلى طريقة إدارة قوانين وضوابط النقد الأجنبي محلياً.

يعني مش معناها إن الدولار خلاص انتهى في ليبيا 😅… لكن معناها إن باب جديد للتجارة مع الصين قاعد ينفتح.

شن صاير في العالم؟

كل الطرق تؤدي للدولار؟ 💵👑

مرة نسمعوا إن الدولار انتهى، ومرة إن الصين حتزيحه، ومرة إن العملات الرقمية هي المستقبل…

لكن المستثمرين حالياً عندهم رأي ثاني.

الرهانات على ارتفاع الدولار وصلت تقريباً 40 مليار دولار بنهاية يونيو، وهو أعلى مستوى من 2015.

والدولار نفسه طلع تقريباً 2% خلال يونيو 📈.

شن السبب؟

السوق يتوقع إن الاحتياطي الفيدرالي الأمريكي ممكن يخلي أسعار الفائدة مرتفعة لفترة أطول، وممكن يرجع يرفعها لو التضخم استمر أعلى من المطلوب.

الفائدة العالية عادة تخلي الدولار أكثر جاذبية للمستثمرين.

لكن مش كل البنوك مقتنعة.

🏦 JP Morgan وGoldman Sachs يميلوا لفكرة إن الدولار يقدر يواصل الصعود.

في المقابل، Morgan Stanley وCredit Agricole يشوفوا إن المستثمرين ممكن يكونوا متفائلين زيادة عن اللزوم، خاصة بعد ما ما التوظيف في سوق العمل الأمريكي تراجع.

علاش الدولار يهمنا في ليبيا؟

لأن أغلب وارداتنا مرتبطة بيه بشكل مباشر أو غير مباشر 💵.

كل ما الدولار يقوى، ممكن يزيد الضغط على أسعار السلع المستوردة، وعلى الذهب، وعلى العملات الثانية.

يعني حتى لو عمرك ما شريت سهم أمريكي… الدولار غالباً عنده علاقة بسعر الحاجة اللي في شكارتك.

الحرب والتضخم… نفس الدوامة 🔥📈

رغم الحرب والتوترات في الشرق الأوسط، بيانات التضخم الأمريكية طلعت أحسن من توقعات السوق، وسجلت أسعار المستهلكين أول انخفاض شهري من ست سنوات.

الأسواق ارتاحت شوية 😮‍💨.

الأسهم طلعت، الدولار ضعف في البداية، والذهب ارتفع.

لكن الهدوء ما طولش.

مع رجوع التوترات، رجع الحذر للأسواق بسرعة.

رئيس الاحتياطي الفيدرالي أكد إن البنك مازال ملتزم بإرجاع التضخم للمستهدف، ومع ارتفاع أسعار الطاقة، احتمال تشديد السياسة النقدية يقعد مطروح علي الطاولة.

والدرس اللي يتكرر كل أزمة؟

لازم ديما ما تنوع استثماراتك 

لو كل استثماراتك في أصل واحد، خبر سياسي واحد ممكن يخسرك فلوسك بالكامل.

الإمارات تحضر للي بعد هرمز 🇦🇪🚢

حتى لو الأزمة الحالية هدت، الإمارات تتعامل مع الموضوع وكأن خطر مضيق هرمز بيقعد موجود.

موانئ دبي العالمية تناقش إنشاء ميناء جديد متعدد الاستخدامات في الفجيرة، مع محطة حاويات جديدة. يعني بيطلعو الشي متعهم من الجهة الثانية ومعش من مضيق هرمز لأن شكله مشكلته مش حا تم في أقرب وقت 

وفي نفس الوقت، شركة الفجيرة العالمية للطاقة تناقش استئجار مستودعات لتخزين النفط على ساحل البحر الأحمر في مصر.

والخطة أكبر من مجرد ميناء 👇

🚢 موانئ جديدة 🛢️ خطوط أنابيب 🚆 شبكات سكك حديدية 🛣️ طرق جديدة

الهدف: تقليل الاعتماد على مضيق هرمز.

وليش الموضوع يهم المستهلك؟

لأن كل طريق بديل للنفط والبضائع يقلل احتمال إن أزمة سياسية توقف الشحن وتطلع تكلفة النقل، واللي في النهاية تنزل عليك أنت في سعر الوقود والسلع.

Strait of Hormuz UAE

وحتى مضيق باب المندب خش على الخط 🚢⚠️

مشاكل هرمز مش سادة، خش خطر ثاني في باب المندب.

حركة السفن في هرمز تراجعت، والحوثيين هددوا حركة الشحن في البحر الأحمر عبر مضيق باب المندب.

وحسب الأخبار ثلاث ناقلات نفط سعودية متجهة للصين والهند غيرت طريقها واتجهت شمالاً من جهة قناة السويس.

باب المندب يخطم منه تقريباً 5.4 مليون برميل نفط يومياً 🛢️.

ولو صار إغلاق أو تعطيل كبير، السفن عندها بدائل زي قناة السويس وخط سوميد أو الالتفاف حول رأس الرجاء الصالح يعني الالتفاف علي أفريقيا كلها .

شن المشكلة؟ الطريق أطول = الوقت أكثر = الوقود أكثر = التكلفة أعلى 💸.

وبحسب السيناريو هذا، النفط ممكن يوصل لـ115-120 دولار للبرميل مقارنة بنحو 98 دولار.

ولو صار هذا فعلاً، الزيادة مش حتوقف عند محطة البنزين.

✈️ السفر أغلى 🚚 النقل أغلى 📦 الشحن أغلى 🛒 والسلع أغلى

تسهيلات جديدة لرواد الأعمال في دبي 🚀🇦🇪

تتفكرو في مبادرة SME in a Box اللي ذكرناها في نشرتنا اللي فاتت، اللي تسهل علي رواد الأعمال تأسيس شركة ؟ زيد عليها أن دائرة الاقتصاد والسياحة في دبي ومصرف أبوظبي الإسلامي أطلقوا حساب مصرفي رقمي جديد ضمن نفس المبادرة SME in a Box للشركات الصغيرة والمتوسطة.

الحساب ممكن ينفتح خلال يوم عمل واحد، بدون حد أدنى للرصيد ومع إعفاء من الرسوم لأول 6 أشهر.

بالنسبة لأي حد جرب يفتح شركة، يعرف إن فتح الحساب المصرفي ممكن يكون واحد من أكثر الإجراءات المزعجة 😅.

أي تقليل للوقت والتكلفة في البداية يقدر يساعد الشركات الصغيرة إنها تركز على البزنس بدل الورق والإجراءات.

الإمارات تبي تنافس Visa وMastercard 💳🇦🇪

قاعدين في الإمارات، واللي بدت تطور في منظومة دفع وطنية اسمها Jaywan - جيون. يبو ينافسو بيها Mastercard and Visa

بنوك زي بنك أبوظبي الأول ودبي الإسلامي بدت تصدر البطاقة، ومتوقع انتشارها يزيد الفترة الجاية.

تقدر تستخدم Jaywan في: 🛍️ المحلات 💻 المواقع الإلكترونية 🏧 الصرافات 📱 المحافظ الرقمية

وفيه شراكة مع Mastercard باش تصدر بطاقة مشتركة Jaywan-Mastercard تشتغل داخل وخارج الإمارات.

ليش الدول تدير شبكات دفع محلية؟

لأنها تقلل الاعتماد الكامل على شبكات الدفع الأجنبية وتخلي جزء أكبر من البنية المالية تحت سيطرة محلية.

مصر تستفيد من تغير طرق التجارة 🇪🇬🚢

نمشو لمصر واللي استفادت من التوتر في المنطقة، واللي عطّل جزء من التجارة العالمية، لكن في المقابل أعطى قناة السويس دفعة.

إيرادات القناة وصلت تقريباً 2 مليار دولار خلال أول 5 أشهر من السنة، مقارنة بـ1.6 مليار في نفس الفترة من 2025.

وعدد ناقلات النفط العابرة زاد 20% في مايو.

وفي خبر مهم ثاني، شركة Maersk رجعت تشغل خدمة إضافية عبر البحر الأحمر تمهيد لعودتها التدريجية لقناة السويس.

بالنسبة لمصر، رجوع شركات الشحن مهم جداً لأن القناة مصدر أساسي للعملة الأجنبية 💵.

مصر تنتج سولار أكثر وبتبدا تصدر سيارات ⛽📈

نسبة الاكتفاء الذاتي من السولار في مصر وصلت لـ68% في أبريل، مقابل 49.3% قبل سنة.

والإنتاج المحلي زاد 45%.

مصر مازالت تستورد جزء من احتياجاتها، لكن كل لتر تنتجه محلياً بدل ما تستورده يوفر جزء من العملة الأجنبية ويخفف فاتورة الاستيراد.

زيدها أن مصر بتبدا في تصدير إنتاج ثلاث سيارات خلال الربع الأخير من السنة للأسواق العربية والأفريقية.

من بينها:

🚘 Nissan Egypt 🚙 General Motors ❓ وشركة ثالثة ما تمش الإعلان عليها

الخطة الحكومية تستهدف صادرات توصل إلى 100 ألف سيارة سنوياً بحلول 2030.

وتطوير صناعة السيارات مش مجرد سيارات.

معناها مصانع أكثر، خطوط إنتاج، موردين، وظائف، وصادرات تجيب عملة أجنبية للبلد.

الساحل الشمالي يبي يخدم طول السنة 🏖️💰

قاعدين في مصر لكن توا بنمشو للساحل الشمالي. نجيب ساويرس وعدد من كبار المطورين أطلقوا مبادرة يلا ساحل.

الفكرة إن الساحل الشمالي ما يكونش مجرد مكان يمشي له الناس شهرين في الصيف، لكن يتحول لوجهة سياحية واستثمارية تخدم أغلب السنة.

الساحل يستقبل تقريباً 15 مليون زائر، والاستثمارات العقارية فيه تجاوزت 200 مليار دولار.

لو ينجحوا في تمديد الموسم، قطاعات زي الفنادق والمطاعم والتجزئة والسياحة ممكن تستفيد بشكل كبير.

إجازتك بالتقسيط؟ ✈️💳😅

بما أننا قاعدين في الساحل فإجازتك تقدر تسهلها علي روحك، خصوصًا إن المصايف زادت أسعارها علي الصيف اللي فات بجو 15% إلى 30%.  لذلك، بنوك في مصر بدت توسع برامج تمويل الرحلات السياحية.

يعطوك قرض يقدر يغطي حتى 100% من تكلفة السفر، وفترة السداد ممكن توصل لـ10 سنوات!

تخيل تمشي أسبوع إجازة… وتقعد تدفع فيها علي 10 سنين 😅.

التقسيط مش سيئ في حد ذاته، لكن المشكلة لما تشوف القسط الشهري الصغير وتنسى السعر النهائي.

الفائدة + الرسوم ممكن تخلي الإجازة أغلى بهلبا من سعرها الأصلي.

الهدف من الإجازة ترتاح… مش ترجع منها ومعاك قسط لـ 2036 😂.

كأس العالم… والناس تراهن بالمليارات ⚽💸

كأس العالم ما كانش مجرد مباريات.

حجم التداول على أسواق التوقعات Prediction Markets تجاوز 50 مليار دولار خلال يونيو.

هذه المنصات تخلي الناس يتداولوا على احتمالات أحداث مستقبلية، زي شكون يفوز في مباراة أو انتخابات أو أحداث اقتصادية.

الرقم الكبير يوضح إن أسواق التوقعات قاعدة تتحول لقطاع مالي بروحه.

Google تربح مليارات… وتصرف أكثر 🤖💰

Alphabet - الشركة الأم لـGoogle سجلت أكبر أرباح فصلية في تاريخها، بصافي دخل وصل لـ112.1 مليار دولار، بزيادة 298%.

جزء كبير من الرقم جي من مكاسب في استثمارات الشركة في شركات ثانية، منها SpaceX، و Anthropic كذلك.

وفي نفس الوقت، إيرادات نشاط Google Cloud زادت 82% ☁️📈.

لكن المستثمرين ركزوا على حاجة ثانية:

المصاريف.

Alphabet رفعت توقعاتها للإنفاق الرأسمالي خلال 2026 إلى حوالي 195-205 مليار دولار.

والنتيجة إن التدفق النقدي الحر وصل للسالب لأول مرة في ربع مالي.

فاتورة الذكاء الاصطناعي تكبر 🤖🔥

القصة مش Google بروحها.

حتى Tesla تتوقع تصرف أكثر من 25 مليار دولار.

الشركات قاعدة تبني مراكز بيانات، تشتري رقائق، تطور موديلات، وتبني البنية التحتية المطلوبة للذكاء الاصطناعي.

السؤال اللي المستثمرين بدوا يسألوه:

امتى الذكاء الاصطناعي بيحول كل المليارات هذه الي انصرفت لأرباح؟

المستثمر مش ضد إن الشركة تصرف… لكن يبي يعرف امتى بيشوف العائد 💸.

وهذا غالباً بيكون واحد من أهم الأسئلة في أسواق الأسهم خلال السنوات الجاية.

مشاكل الأثرياء: إيلون ماسك خسر 40.7 مليار دولار في يوم واحد 😳💸

ثروة إيلون ماسك نقصت 40.7 مليار دولار في جلسة واحدة مع تراجع قيمة حصته المرتبطة بـSpaceX.

باش نستوعبوا الرقم:

الخسارة بروحها أكبر من ثروات حوالي 90% من المليارديرات الموجودين في قائمة Bloomberg.

طبعاً هذه مش 40 مليار كاش طلعوا من حسابه 😅.

هي خسارة "على الورق" بسبب انخفاض قيمة الأصول اللي يملك فيها.

وما تخافوش عليه هلبا … مازال أغنى شخص في العالم 😂.

وفي النهاية، سواء تحكي على دولة أو شركة أو حتى ميزانيتك الشخصية، نفس القاعدة تتكرر:

الدخل وحده مش كافي… المهم كيف تدير الفلوس. 💰

نلقوكم في العدد الجاي من ولد السوق 🚀

أنستو بعضكم