⚽🌍 أكبر كأس عالم في التاريخ... 🚀💰 وأكبر اكتتاب في التاريخ... 🔒💻 وهجوم إلكتروني على مصرف ليبيا المركزي!
نشرة ولد السوق 🚀 محصلة أخبار الاقتصاد في جيبك
نهاركم مبروك 🌞
نهاركم طيب 👋
هذا الشهر الأسواق عطتنا خلطة غريبة... أكبر اكتتاب في التاريخ، أكبر كأس عالم في التاريخ، والفيدرالي الأمريكي مازال يخوف في المستثمرين من استمرار الفائدة المرتفعة.
أما في منطقتنا، فشفنا أخبار مهمة من دبي ومصر، وفي ليبيا كان الخبر الأبرز هو الهجوم الإلكتروني على مصرف ليبيا المركزي، بالإضافة إلى تحسن إيرادات النفط.
خلونا نشوفوا أهم الأخبار.
🇱🇾 شن صاير في ليبيا في شهر ستة؟
🔒 هجوم إلكتروني علي مصرف ليبيا المركزي
مصرف ليبيا المركزي قال أن فريقه الفني نجح في احتواء هجوم إلكتروني استهدف البنية التحتية للأنظمة الرئيسية، وهذا سبب في إيقاف خدمات النقد الأجنبي مؤقتاً كإجراء احترازي قبل ما تولي للعمل بشكل طبيعي.
📍 كويس أن المصرف أكد أن البيانات المالية متأثرتش ولا الأنظمة الحساسة.
💡 اليوم أي مصرف في العالم ممكن يتعرض لهجوم إلكتروني، وهذا ما عادش شيء غريب. المهم هو كيف يتعامل مع الهجوم، وهل يقدر يسيطر عليه بسرعة قبل ما يأثر على فلوس الناس أو الخدمات المصرفية.
Central Lyan Bank
🛢️ النفط يعطي الاقتصاد الليبي دفعة من جديد
ليبيا حققت ارتفاع في إيرادات النفط في شهر خمسة، مستفيدة من تحسن أسعار النفط في العالم واستمرار مستويات الإنتاج.
لكن اللافت أكثر، هو توجه المؤسسة الوطنية للنفط لاستخدام تقنيات الذكاء الاصطناعي والحلول الرقمية لتحسين إنتاج الحقول الحالية، بدل الاعتماد على اكتشاف حقول جديدة بس.
📍 مرات زيادة الكفاءة ادير نتائج أسرع وأرخص من حفر آبيار جديدة، خاصة لما صاير تقلب في أسعار النفط في العالم.
🌍 شن صاير في المنطقة؟
🏠 باش تشري أول حوش في دبي بدي أسهل
أكثر من 3200 مقيم قدرو يشروا أول حوش ليهم عن طريق برنامج "تملك العقار الأول"، اللي سجل إجمالي معاملات فاتت الـ 5 مليارات درهم.
زيد عليها أن مطورين جدد انضمو للبرنامج، ووصل عدد الشركات المشاركة إلى 22 شركة.
📍 الهدف واضح... تشجيع المقيمين على الاستقرار والاستثمار داخل الدولة.
💼 عندك فكرة مشروع بديرها في دبي؟
مالا عليك وعلي مبادرة Box in a SME، وهي مبادرة تجمع كل الخدمات الأساسية اللي يحتاجها رواد الأعمال لتأسيس الشركات في منصة واحدة.
وبحسب الجهات المنظمة، المبادرة هذه ممكن توفر أكثر من 80 ألف درهم على الشركات الصغيرة، من غير أنها تختصرعليك الوقت والإجراءات.
في كل سنة نشوفوا في الدول تتنافس أكثر على جذب رواد الأعمال... لأن الشركات الجديدة تعني وظائف واستثمارات ونمو اقتصادي.
🇪🇬 استثمارات إماراتية جديدة في مصر
في الجهة الثانية من البحر الأحمر وقعت شركة ألكازار إنرجي الإماراتية اتفاقية بقيمة 420 مليون دولار للاستحواذ على محطة رياح جبل الزيت في مصر.
الصفقة توريك استمرار تدفق الاستثمارات الخليجية إلى مصر، بالذات في قطاع الطاقة، وتدعم برنامج الحكومة لجذب استثمارات أجنبية جديدة.
🏦 تأجيل طرح بنك القاهرة
تأجل الطرح العام الأولي لبنك القاهرة بعد تأجيل الجولات الترويجية للمستثمرين إلى سبتمبر أو أكتوبر الجايين.
وفي المقابل، بدي تداول سهم شركة قرة لمشروعات الطاقة والاستثمار في البورصة المصرية.
يعني رغم تأجيل بعض الطروحات، السوق مازال يشهد شركات جديدة تقدر تتداول فيها في البورصة المصرية .
📈 أدوات استثمار جديدة في البورصة المصرية
البورصة المصرية أعلنت إطلاق العقود المستقبلية على أسهم البنك التجاري الدولي وطلعت مصطفى.
كلما تزيد الأدوات الاستثمارية، تزيد الخيارات قدام المستثمرين، لكن في المقابل تزيد أهمية أنك تفهم المخاطر قبل ما تخش.
📉 التضخم في مصر قاعد يتراجع
التضخم في بعض المدن المصرية نزل إلى 14.6٪ للشهر الثاني على التوالي.
الأسعار قاعدة ترتفع، لكن بسرعة أقل، وهذا يعطي البنك المركزي المصري فرصة يخلي أسعار الفائدة من غير تغيير في الفترة الجاية.
🚢 مصر بتزيد الرسوم في قناة السويس
هيئة قناة السويس قالت أنها بتزيد الرسوم الإضافية على أغلب السفن اللي بتخطم من غاذي بداية من نص سبعة.
كل زيادة في إيرادات القناة تعني عملة صعبة تخش للدولة المصرية، وهذه حاجة مليحة لدعم الاقتصاد المصري.
Egypt Boursa
🌍 أخبار عالمية
🚀 SpaceX متع إيلون ماسك ... أكبر اكتتاب في التاريخ
الشهر اللي فات تم إدراج SpaceX في صفقة قد وصلت قيمتها لـ 75 مليار دولار، بسعر سهم في جو الـ 135 دولار.
طبيعي أي حاجة ليها علاقة بإيلون ماسك ادير دوشة، لكن السؤال هني مش حجم الاكتتاب...
قبل ما تتحمس وتقول "لازم نشري"، اسأل نفسك سؤال بسيط:
الشركة خاشة البورصة باش تجمع فلوس للتوسع؟ ولا لأن المستثمرين القدامى يبوا يبيعوا جزء من حصصهم؟
📍 الفرق كبير.
إذا كانت الفلوس حتخش للشركة، فهذا في الأغلب يساعدها على النمو. أما إذا كان أغلب الطرح عبارة عن بيع حصص من المستثمرين الحاليين، فهذا معناه إن جزء كبير من الفلوس ماشي للمساهمين القدم، مش للشركة نفسها.
💡 الدرس ليك كمستثمر: ما تخليش اسم الشركة أو الضجة الإعلامية هو سبب قرارك. اقرأ تفاصيل الاكتتاب، واعرف وين ماشية الفلوس قبل ما تستثمر.
🇺🇸 الفيدرالي الأمريكي الباين أنه مش حا يخفض الفائدة في المستقبل القريب
الاحتياطي الفيدرالي الأمريكي خلى أسعار الفائدة زي ما هي، لكن تصريحاته كانت متشددة أكثر من ما توقعت الأسواق.
التضخم في أمريكا قاعد عند 4.2٪، وبعض أعضاء الفيدرالي قاعدين يشوفو في أن ممكن في رفع جديد للفائدة العام هذا.
النتيجة؟
📍 الدولار يقعد قوي. 📍 الذهب يتحرك ما بين ضغوط الفائدة والتوترات الجيوسياسية. 📍 وأسواق الأسهم تقعد متقلبة.
✈️ كانك بتسافر الصيف هذا … وتي جيبك لأن ممكن يكلفك أكثر من قبل
اتحاد النقل الجوي الدولي قال إن أرباح شركات الطيران حتنخفض، والسبب ارتفاع أسعار الوقود والتوترات اللي صايرة في المنطقة.
شن يعني الكلام هذا؟
📍 أسعار التذاكر غالباً حتركب. 📍 العروض الرخيصة حتقل. 📍 وحتى بعض الرحلات ممكن شركات الطيران توقفها أو تقللها.
يعني كان عندك سفر، الأحسن تحجز من توا بدل ما تستنى لآخر لحظة.
Summer break
⚽ أكبر كأس عالم في التاريخ
كأس العالم 2026 بدي، لكن المرة هذي غير أي نسخة قبلها.
📍 لأول مرة يشارك 48 منتخب. 📍 ولأول مرة البطولة تتلعب في 3 دول: أمريكا، كندا والمكسيك. 📍 وحتى العرب كانت عندهم أكبر مشاركة في تاريخهم، بـ 8 منتخبات. 👏
أما بنك Goldman Sachs، فيتوقع إن:
🥇 إسبانيا هي الأقرب للكأس. 🥈 فرنسا بعدها. 🥉 والأرجنتين في المركز الثالث.
لكن خلونا نكونوا واقعيين... الكرة عمرها ما تمشي بالحسابات، وديما فيها مفاجآت.
ونفس الشي في الاستثمار... التحليل مهم، لكن السوق مرات يمشي في اتجاه ما حدش كان متوقعه.
💡 معلومة استثمارية
كل ما تسمع على شركة خاشة للبورصة، ما تمشيش تجري ورا الناس.
وقف دقيقة واسأل نفسك:
✅ الشركة هذي أصلاً تربح ولا لا؟ ✅ سعرها معقول ولا مبالغ فيه؟ ✅ الفلوس اللي حتتجمع من الاكتتاب حتمشي للشركة باش تكبر وتوسع شغلها، ولا المستثمرين القدم قاعدين يبيعوا حصصهم ويطلعوا؟ ✅ لو اسم الشركة ما كانش مشهور... هل كنت حتفكر تشري فيها؟
ديما تذكر...
ما تشريش في الدوشة... اشري شركة تستحق تستثمر فيها.
🚀 أخبار بورصة AI
في بورصة AI مازلنا قاعدين نطوروا في المنصة، ونجهزوا في محتوى وكورسات جديدة باش نبسطوا الاستثمار والأسواق المالية لكل واحد يبي يتعلم.
هدفنا بسيط...
إن الاستثمار ما عادش يكون حاجة معقدة، ويولي مفهوم لأي ليبي يبي يبدأ رحلته في عالم الاستثمار.
نشوفوكم في العدد الجاي... يومكم طيب 📈💚
